Пияток, 9. децембра на Драмским мемориялу одбавена представа за дзеци „Царово нови шмати” автора Г. К. Андерсена, а порихтало ю Дружтво за помоц МНРО „Белава птица” зоз Кули. 

Єлена Фачол, режисерка, поробела адаптацию и сценоґрафию. У представи ґлумели заняти у „Белавей птици” и хаснователє услугох у дньовим и домским змесценю у кулским дружтве за помоц и унапредзенє квалитета живота особом зоз почежкосцами у розвою. У даєдних сценох на бини було 30 особи, та публика праве тоту масовносц и добре одбавени улоги наградзовала зоз моцнима аплаузами.

Представа указала же и особи цо маю почежкосци у розвою можу указац тото цо знаю лєм кед ше им да добри условия. Коло пейц мешаци рихтали представу, премиєра була на Фестивалу у Червинки, а на Мемориялу им то було друге бавенє.

У представи ґлумели: Алекса Томич, Єлена Фачол, Маша Вуячич, Николина Чанади, Душан Младенович, Єлена Иван, Ґордана Виславски, Уна Барович, Даниєла Бабич, Дарко Геґедиш, Жана Жарич, Йована Кривокуча, Мирко Дакович, Марко Кошутич, Мирослав Виславски, Ивана Зазуляк Папуґа, Ясмина Ковач, Клаудия Няради, Виктория Мученски, Милош Дарадан. Танєчнїки були Зорица Маринков, Дьордє Ралетич, Стефан Баджа, Милинка Мирицки, Катарина Кривокуча, Милош Рашкович.

Превжате зоз Рутенпресу