Дом култури Руски Керестур розписує Конкурс за нови шпиванки у забавним духу.

Конкурс отворени по 31. марец 2023. року.

1. Право конкуровац маю шицки заинтересовани особи зоз жеми и иножемства. Єдна особа може буц автор лєбо коавтор найвецей двох шпиванкох.
2. Шпиванки котри ше посилаю на конкурс нє шму буц предходно виводзени.
3. Тексти треба же би були придати у паперовей форми з кирилку, лєбо електронски у вордовим документу.
4. Музика треба же би була нотно записана.
5. Музика може буц придата и на ношачу звука, алє муши буц провадзена з нотним записом.
6. У случаю же автор нє може направиц нотни запис – Орґанизатор помогнє же би ше записало.
7. У случаю хаснованя нєавторского текста, нєобходне мац дошлєбодзенє автора.
8. Орґанизатор розпише аранжман, кед ше з автором иншак нє утвердзи.
9. Приява на конкурс ше посила по пошти, або особнє на адресу:

Дом култури Руски Керестур,

Русинска 75, 25233 Руски Керестур,

За Фестивал рускей култури Червена ружа.

Лєбо на мейл: dk.kerestur@gmail.com

1. Шпиванки будзе препатрац и виберац фахова комисия хтору менує Орґанизатор.
2. Оценьованє и вибор шпиванкох хтори буду виведзени на Фестивалу окончи фахова комисия хтору менує Орґанизатор.
3. З посиланьом прияви на конкурс, подношитель (композитор и текстописатель) дава согласносц же би ше вибрани шпиванки виводзели явно на Фестивалу, преношели и емитовали на програмох Радио Нового Саду и Радио Телевизиї Войводини зоз шицкима познатима модалитетами емитованя, зазначели, умножели и положели до обтоку без огляду на способ умножованя и кладзеня до обтоку, зняли на ношачи звука, односно слики и звука, умножели и положели до обтоку без огранїченя у поглядзе числа прикладїнкох. Согласносц ше дава за доручени шпиванки и шпиванки вименєни и преробени з аранжманами за потреби Фестивалу и Дома култури Руски Керестур як орґанизатора, а без огляду на форму у хторей су зазначени (нотни запис, знїмок, итд). Права ше преноши виключно предметно, часово и просторно и по чишлє без огранїченя. Фестивал и орґанизатор Дом култури Руски Керестур маю право наведзни права пренєсц на треци особи, без потребней согласносци коавторох.