Пияток, 23. авґуста ше у хорскей сали Дома култури Руски Керестур стретли представителє керестурских институцийох и орґанизацийох зоз членами Орґанизациї за зєдинєнє Руснацох у Мадярскей.

Представитель Орґанизациї Тибор Уяцки пояшнєл же з тей нагоди пришли лєм до Руского Керестура, а нащива ма два цилї: перши – ожиц контакти медзи Руснацами зоз Мадярскей и Бачки, а други циль им паломнїцке путованє и нащива Церкви св. Миколая и Водици.

На стретнуцу ше бешедовало о Руснацох у Мадярскей, як и о можлївосцох сотруднїцтва на рижних уровньох.

Стретнуце було удатне и такой превжати крочаї же би ше сотруднїцтво и реализовало. З оглядом же у Керестуре, 24. авґуста орґанизоване змаганє у вареню рибового котлїка, єден з членох делеґациї мадярских Руснацох, на поволанку секретара Месней заєднїци Михайла Пашу, участвовал на тим змаганю.

Госци зоз Мадярскей остали у Керестуре по нєдзелю, а плановали нащивиц Здруженє женох „Байка“, музей у будинку Замок, Марийово святилїще Водицу, манастир и малу шестру Мартину.