У рамикох 64. Фестивала рускей култури Червена ружа, всоботу, 28. юния отримане Червене пупче.

Тогорочне 57. Червене пупче отворели наймладши зоз Музичней оводи, хтори одшпивали два шпиванки Жаба дохторка и Тоти мойо окуляри, а потим дзецински хор Шкорванчки одшпивал Нашо швето, цо ше традицийно шпива на Пупчу од 1983. року.

У змагательней часци того року одшпивани осем нови шпиванки. За найлєпшу преглашена шпиванка Жаданє за котру музику написала Саня Дивлякович. Друга награда додзелєна за шпиванку Дарунок за котру музику написал Юрай Судї, док за шпиванку Тайни за котру музику написал Борис Маґоч додзелєна треца награда.

Награду за найлєпши текст того року достала Весна Медєши за шпиванку Нашей учительки.

Друга часц Пупча була ревиялна, а публика одслухала ище пейц шпиванки зоз прешлих фестивалох. Програму водзели Ена Сабадош и Марко Еделински.

Музични руководителє програми були Татяна Фейди и Кристина Афич, асистент була Дорика Емейди, а аранжмани за шицки нови шпиванки написал Мирослав Пап.

Руководителька Червеного пупча була Ребека Планчак, а шицки шпиванки провадзел дзецински хор Шкорванчки.

Тогорочне 57. Червене пупче закончене зоз шпиванку Тисяч радосци.