За конєц 65. Фестивалу рускей култури Червена ружа, всоботу, 27. юния, отримани Вечар фолклорних ансамблох, на хторим, попри домашнїх, у штернац точкох наступели и учашнїки зоз Коцура, Дюрдьова, Нового Саду як и госци з Републики Горватскей.

Вечар отворени зоз шпиванку Ружи, червени ружи хтору одграл Народни оркестер Юлиян Рамач Чамо, а потим учашнїкох Фестивала и шицких присутних з пригоднима словами привитали – предсидатель орґанизацийного Одбору Фестивала, Желько Ковач, заменїк предсидательки Општини Кула, Кароль Валка, як и подпредсидатель Покраїнскей влади Томислав Жиґманов.

Вечар фолклорних ансамблох отримани на бини у дворе Школи „Петро Кузмяк”, после дзецинского фестивалу „Червене пупче”.

Пред числену публику аматере ше представели зоз шпиванками и танцами, а дзепоєдни и з вецей точками. Окрем домашнїх з Руского Керестура, наступели и аматере зоз Коцура, Дюрдьова, Нового Саду и госци з Миклошевцох, у Горватскей.

Конферансу водзели Адриана Надь Барна и Андрей Орос, а руководителька манифестациї була Андрея Бики.

Фестивал софинансовали – Општина Кула, Национални совит Руснацох, Министерство култури и информованя Републики Сербиї, Покраїнски секретатрият за културу, явне информоваанє и одношеня зоз вирскима заєднїцами, як и числени подприємства и други спонзоре.

После наступу ансамблох друженє за публику и учашнїкох, зоз музику Тамбурового оркестру Дома култури Руски Керестур, предлужене коло Спорскей гали.