Дзецинска секция Драмского студия „Артˮ вчера, 26. марца, у Културним центре у Кули, премиєрно виведла представу „Петро Панˮ.

Представа правена по тексту хтори написал шкотски писатель Джеймс Метю Бари, а у режиї Ребеки Планчак и Мирослава Малацка.

Приповедка „Петро Панˮ одвива ше на острове на хторим жию страцени дзеци хторих предводзи Петро Пан и Индиянци. Нємир приноша гусаре хтори на рижни способи пакосца страценим дзецом и Индиянцом и правя нєзлагоду, а у чим их пробує зопрец хлапец хтори нє жада одроснуц – Патро Пан.

Пред полну салу у Културним центре того вечара наступели аж двацецеро члени дзецинскей драмскей секциї – Олеґ Катона, Даниєла Рамач, Ена Сабадош, Михаела Малацко, Марко Еделински, Андрей Надь, Милица Джакула, Даниєл Винаї, Стефани Рац, Лара Рац, Кристина Рамач, Йована Кушич, Надя Варґа, Сара Малацко, Хана и Лена Пашо, Заря Ковач, Лина Папуґа и Надя Станкович, а през приповедку патрачох того вечара водзела Кристина Гарвильчак.

Технїчна потримовка – за музику задлужени Неманя Вукосав, майстор за шветло Желько Пашо, док за костими, шминку и фризури задлужени Андрея Штефанко и Сара Планчак.

Представа „Петро Панˮ виведзена у рамикох 57. Драмского мемориялу Петра Ризнича Дядї, а по реакциї численей публики представа була успишно одбавена, алє и барз нащивена.

Шлїдуюце єй виводзенє будзе у априлу на Општинскей смотри у Червинки.

Ґалерия