Пейдзешат штварти Драмски мемориял Петра Ризнича Дядї почнє на соботу, 3. децембра, а будзе тирвац по 11. децембер.

Мемориял 3. децембра отвори представа у виводзеню Руского народного театра „Петро Ризнич Дядя” – „Метаморфози”, автора Милоша Николича чийо тексти уж даскельо раз виводзени на керестурскей сцени, а у режиї Славка Ороса. Потим шлїдзи представа „Меркуй жени” у адаптациї и режиї Янка Лендєра, на текст Андрея Курейчика, котру 4. децембра виведзе КУД „Тарас Шевченко” зоз Дюрдьова.

У режиї Владимира Надя Ачима, по тексту Жана Жаниєа представу „Служнїци” 9. децембра виведзе старша ґрупа Студио „Арт”.

Руски културни центер Нови Сад, 10. децембра виведзе представу „Початок” котрей автор и режисер Славко Винаї.

Планована госцуюца представа будзе 11. децембра, а то представа „Тестостерон” Анджеа Сарамановича у режиї Радоя Чупича. Представу одбави Словацки войводянски театер з Бачкого Петровцу.

Вечарши представи буду починац од 19:30 годзин.

На тогорочним Мемориялу публика будзе мац нагоду одпатриц и три представи за дзеци. На стреду, 7. децембра на 12,30 годзин, будзе виведзена представа „Бал” у самостойней продукциї Саши Палєнкаша, а у режиї Адрияни Надь Барна. Штварток у исти час публики на Мемориялу ше представи КПД ДОК – Нови Сад з представу „Пандемия и я” у режиї Катарини Фейди. МНРО „Белава птица” з Кули виведзе представу „Царово нови шмати” автора Ганса Кристияна Андерсена у режиї Єлени Фачол, тиж на 12,30 годзин.

Под час Меморияла, у голу Дома култури будзе и вистава, а нащивителє ю годни видзиц каждого дня на 19 годзин, скорей як почнє представа.

Превжате зоз Рутенпресу