Дом култури Руски Керестур розписує Конкурс за нови шпиванки за дзеци.

Конкурс отворени по 31. януар 2025. року.

1. Право конкуровац маю шицки заинтересовани особи зоз жеми и иножемства. Єдна особа може буц автор лєбо коавтор найвецей двох шпиванкох.
2. Шпиванки котри ше посилаю на конкурс нє шму буц предходно виводзени.
3. Музика треба же би була нотно записана.
4. Тексти треба же би були придати у паперовей форми з кирилку, лєбо електронски у вордовим документу и же би бул подписани под ноти.
5. У случаю же автор нє може направиц нотни запис – Орґанизатор помогнє же би ше записало.
6. Музика треба же би мала шицки часци мелодиї – увод, строфа, пришпив…
7. Музика може буц придата и на ношачу звука, алє муши буц провадзена з нотним записом.
8. У случаю хаснованя нєавторского текста, нєобходне мац дошлєбодзенє автора.
9. Орґанизатор розпише аранжман, кед ше з автором иншак нє утвердзи.
10. Приява на конкурс ше посила по пошти, або особнє на адресу:

Дом култури Руски Керестур,

Русинска 75, 25233 Руски Керестур,

За Фестивал рускей култури Червена ружа.

Лєбо на мейл: dk.kerestur@gmail.com

11. Шпиванки будзе препатрац и виберац фахова комисия хтору менує Орґанизатор.
12. Оценьованє и вибор шпиванкох хтори буду виведзени на Фестивалу окончи фахова комисия хтору менує Орґанизатор.
13. Автор ма право предложиц шпивача, а конєчну одлуку вибору шпивача ма Орґанизатор.
14. З посиланьом прияви на конкурс, подношитель (композитор и текстописатель) дава согласносц же би ше вибрани шпиванки виводзели явно на Фестивалу, преношели и емитовали на програмох радийних, телевизийних и интернет медийох зоз шицкима познатима модалитетами емитованя, зазначели, умножели и положели до обтоку без огляду на способ умножованя и кладзеня до обтоку, зняли на ношачи звука, односно слики и звука, умножели и положели до обтоку без огранїченя у поглядзе числа прикладїнкох. Согласносц ше дава за доручени шпиванки и шпиванки вименєни и преробени з аранжманами за потреби Фестивалу и Дома култури Руски Керестур як орґанизатора, а без огляду на форму у хторей су зазначени (нотни запис, знїмок, итд). Права ше преноши виключно предметно, часово и просторно и по чишлє без огранїченя. Фестивал и орґанизатор Дом култури Руски Керестур маю право наведзени права пренєсц на треци особи, без потребней согласносци коавторох.