На соботу, 31. октобра, будзе отримани 59. Фестивал рускей култури Червена Ружа у вименєней форми, присподобеней актуалним епидемиолоґийним обставином.

Фестивал будзе отримани як ревиялни концерт на хторим буду учашнїки лєм зоз Руского Керестура, а на хторим наступя солисти, Дзивоцка шпивацка ґрупа «Ария» и Вельки народни оркестер Дома култури. Учашнїки виведу народни и забавни композициї зоз скорейших Ружох. Програма будзе отримана у Велькей сали Дома култури, а будзе преношена и наживо прейґ дружтвених мрежох.

Знїмок виводзачох познєйше будзе емитовани и на Ют’юб каналу и на фейсбук ґрупи Дома култури, а у Велькей сали, наступ керестурских виводзачох годни провадзиц 85 патраче, кельо допущене пре актуалну епидемиолоґийну ситуацию.

Тиж, обовязне почитованє шицки предвидзених защитних мирох, насампредз ношенє маски и триманє препорученей оддалєносци, а на уходзе до сали нащивительом будзе превентивно мерана тїлесна температура.

Уходнїца за тогорочни Фестивал виноши 100 динари, а програма почнє на 19 годзин.