Вчера дополадня, у Доме култури у Руским Керестуре отримана промоция нових кнїжкох за дзеци, зоз чим отворена 27. Културна манифестация «Костельникова ешень», а пре актуални емидемиолоґийни стан, промоция отримана онлайн, односно прейґ Фейсбук профилу Дома култури Руски Керестур.

Тогорочну Манифестацию отворел редактор Видавательней дїялносци и модератор програми Микола Шанта, а потим директор НВУ «Руске слово» др Борис Варґа поинформовал патрачох о планох Видавательней дїялносци тей Установи за наступни период.

Редакторка сликовнїцох «Родзини» и «Фарби», Мелания Римар, потим представела сликовнїци за дзеци, а присутни авторки – Наташа Еделински Миколка зоз Беркасова, Марина Дудаш зоз Руского Керестура, Оксана Мудри Недич зоз Коцура и Златка Чизмар и Кристина Шепински обидва зоз Керестура, пречитали даскельо свойо писнї, док илустраторка Аня Гудак, зоз патрачами подзелєла свойо упечатки роботи на сликовнїци «Фарби».

О кнїжки за дзеци «Вселенски корабель» бешедовал сам автор, Сашо Палєнкаш, як и рецензентка Люпка Малацко, а школярка шестей класи Основней школи «Петро Кузмяк», Яна Варґа, бешедовала о своєй учасци у твореню илустрацийох за спомнуту кнїжку.

У остатнєй часци Манифестациї, патрачом ше представела и авторка кнїжки «Таньов швет» Оленка Живкович, хтора потим пречитала приповедку зоз спомнутей кнїжки, а о нєй приповедала и єй рецентзентка Наталия Зазуляк.

Вчерайша презентация кнїжкох за дзеци, закончена зоз представяньом кнїжки «Страшидла, нє зашмеюйце ме» авторки Даниели Тамаш, хтора ше на тот завод патрачом явела прейґ видео-бима.

На концу, модератор програми Микола Шанта поволал шицких присутних же би попровадзели и другу часц Манифестациї «Костельникова єшень», хтора будзе емитована 18. децембра, з початком на 14 годзин, тиж на Фейсбук профилу Дома култури Руски Керестур, а потим и «Дньовку», хтора будзе емитована на МАК-овим Ют’юб каналу, 19. децембра на 19 годзин.