Почитовани родичи и дзеци, за викенд, 23. и 24. септембра будзе отримана театрална роботня «Цо пожадам, тото можем буц», хтору ше реализує у сотруднїцтве зоз Здруженьом младих Пакт Рутенорум и Домом култури Руски Керестур (ДКРК), а зоз потримовку Заводу за културу войводянских Руснацох. Роботня будзе у Велькей сали ДКРК у пополадньових годзинох, од 14г, та до 16г, 16г и 30мин, у зависносци од числа приявених дзецох.

У роботнї можу участвовац шицки заинтересовани дзеци другей, трецей и штвартей класи основней школи. Циль того проєкту же би шицки дзеци того возросту мали нагоду опробовац ше у ґлуми, видзиц цо театер, яки процес поставяня представи, яки задатки членох ансамблу и технїки на бини и споза нєй, алє тиж и яки бон-тон патрачох, кельо публика значна за театер… Будземе робиц ґлумецки вежби, вежби за дикцию и правилне вигварянє, алє и облєкац костими, научиме хто то суфлер, як намесциц сценоґрафию у цмоти, итд.

Була бим подзековна кед би ми ше родичи заинтересованих дзецох явели зоз порученьом, лєм прето же бизме знали обезпечиц материял и потребни ствари и задатки за шицких учашнїкох.
Роботня ше нє плаци.

Чекаме вас! Радуєме ше друженю на бини!