Фестивал европского филму у сотруднїцтве зоз Еу инфо Поинт Нови Сад, и Здруженьом гражданох „Pact Ruthenorumˮ орґанизує проєкциї трох филмох хтори заказани за два пиятки, 13. и 20. октобер.

Филмски проєкциї ше отрима у просторийох Пакт Рутеноруму, односно на поверху керестурского диску „Амадеусˮ. Уход ше нє будзе наплацовац.

Филми хтори ше приказує на тогорочним Фестивалу европского филму обрабяю теми социялней правди, людских правох и правох меншинох, фамелийни одношеня и подобне, а од жанрох заступени трилери, комедиї, фантастика, як и историйни и романтични филми.

Керестурска публика 13. октобра, на пияток, на 20 годзин годна одпатриц фамелийну драму з назву „Муринаˮ, а потим на 21:45 филм „Моя любовна вяза зоз малженствомˮ („Моја љубавна веза са бракомˮ).

Шлїдуюцого тижня, тиж на пияток, 20. октобра, на репертоару на 20 годзин будзе проєкция холандскей драми „Митраˮ.

Караван Фестивалу европского филму у Войводини потераз нащивел Бечей, Бачку Паланку, Зомбор, Вершец, а окрем у Керестуре филми буду годно одпатриц и у Апатину, Лукичеве и Новим Садзе.

Филми часц проєкту Cineuropa хтори Европска комисия у новембру 2018. року започала з цильом же би потримала креиранє и унапредзованє квалитету европских филмских фестивалох.

З проєктом руководзи конзорциюм хтори формовали Институт Ґете, Французки институт и Cineuropa, портал за промоцию европскей кинематоґрафиї.