Други, главни дзень Водовей отримани всоботу 18. юлия, а за розлику од першого дня кед наступали числени ди-джейове, тераз наступели бенди.

Други дзень почал зоз наступами керестурских бендох. Перши наступели дзивчата зоз бенду „Women power” Дома култури Руски Керестур, чий руководитель Сашо Палєнкаш, а потим ше численей публики хтора их пришла потримац представели и бенд „Шорт нотис”, хторим то бул перши фестивалски наступ, як и бенд „Мацерово мушкатли”.

Керестурски бенди направели добру атмосферу и пририхтали публику за наступи афирмованих и познатих беоґрадских панк и рок бендох „Йорґовани”, „Исказ” и „Осми дзень”, хтори потим зоз твардима звуками и моцну енерґию отримовали добре розположенє по конєц вечара.

По законченю наступох бендох, за афтер журку до рана були задлужени керестурски ди-джей Хруби, односно Михайло Грубеня и добре познати ди-джейове зоз Дроп Сенсеи орґанизациї, Бранимир Боянович и Борис Ройко.