
Зоз музичним албумом „Генцареˮ отворена тогорочна Костельникова єшень
14. новембер 2026.
Наймладши члени Дома култури наступели пред полну салу
16. новембер 2026.У преполней Велькей сали Дома култури, всоботу, 14. новембра отримани донаторски Културов концерт на хторим наступели старши секциї аматерох.
У програми участвовали танцоше Фолклорного ансамблу Дома култури, Женска и Леґиньска шпивацка ґрупа, ґрупа Ария, солиста Мирослав Малацко, Владимир Малацко як и Народни оркестер „Юлиян Рамач Чамо”.
Фолклорни ансамбл, окрем своєй познатей хореоґрафиї „Карички, чапаши, чардаши”, публики представел и три нови танци „Березнянка”, „Банатски мотиви” и „Иґре са Старе планине”, за хтори их пририхтали їх руководителє Лариса Роман, Мирко Надь, Ивана Шомодї и Желько Ковач.
Женска шпивацка ґрупа, под руководством Ирини Олеяр и Еуфемиї Планкош, одшпивала штири шпиванки, два були у акапела верзиї, а у двох шпиванкох их на клавиятури провадзел Владимир Малацко. Леґиньска шпивацка ґрупа одшпивала два народни шпиванки у провадзеню Народного оркестру Дома култури „Юлиян Рамач Чамо”, а оркестер ше, под руководством Кристияна Нярадия, представел и зоз венчиком народних шпиванкох. На концерту наступели и Дзивоцка шпивацка ґрупа фолклорного ансамблу, солиста Мирослав Малацко, як и дзивоцка ґрупа „Ария”, а на концу шицки учашнїки вєдно на бини одшпивали шпиванку „Блукал я уж велї роки”, цо числена публика наградзела зоз моцним аплаузом.
Того вечара у сали нє могли шицки найсц место за шедзенє, та даєдни на кус длужей як годзиновим концерту, уживали и на стояцо нє шпоруюци дланї и слова потримовки за шицких учашнїкох. Окремну потримовку достал фолклорни ансамбл, на чию инициятиву и орґанизовани концерт, а у остатнєй кореоґрафиї мушели висц и на бис.
На уходзе до сали були положени два шкатули за добродзечни прилоги, а шицок назберани пенєж будзе похасновани за купованє народного облєчива.












